🌺 கற்பக மூர்த்தி

கற்பக மூர்த்தியே இன்பத்தின் கீர்த்தியே! பொற்பதம் பணிவோம் துன்பத்தை நீக்குவாய்! சொற்பதம் சொல்லுவோம் சோகத்தைப் போக்குவாய்! நற்கதி அருளுவாய் நல்விநாயக மூர்த்தியே!

🌺 வடிவேல் முருகன்

சிவமைந்தனாய் சிரிக்கும் முருகா தவமிருந்தால் தனம்தரும் முருகா வள்ளியின் கணவா வடிவேல் முருகா அள்ளிப்பருகிட அருள் தரும் முருகா

🌺 ராயவரம் செங்கிடாய் கருப்பர் பதிகம்

அழகான ராயவரம் கோவிலில் குடிகொண்டு அரசாள வந்த கருப்பன் அடிதடியின் வாழைபோல் எனது குலங்கோத்திரம் அத்தனையும் காக்கும் கருப்பன் மேலாளர் கீழாளர் பேதங்கள் இல்லாது மெய்யாள வந்த கருப்பன் முன்னோடி சப்பாணி இருவரையும் கொண்டிந்த உலகாள வந்த கருப்பன் புது மனையில் செங்கிடாய் கருப்பனிவன் கோவில் கொண்டாடு மனமே! புண்ணியத் தீர்த்தமும் மரிக்கொழுந்து பொய்கையில் பெற்றாலே புகழோடு வாழ்வு வருமே! கரியபெரு மீசையும் கையிலோரு அரிவாளும் கருப்புநிற பட்டுமுடையான் காலினில் சலங்கையுடன் காணக்கண் கூசுதே குதிரைமேல் ஏறி வருவான் ஏவல் பில்லி சூனியம் எவர்செய்ய வந்தாலும் இயலாது கருப்பனிடமே! எதுவந்தாலும் போனாலும் கருப்பண்ணன் கருணையாம் எல்லாம் நலமாகுமே! கருப்பண்ணன் வாழ்கின்ற ராயவரம் என்றும் கைலாயம் போலிருக்கும் கொண்டாடு கொண்டாடு கருப்பண்ண சாமியை குறையாத செல்வம் மிகுமே!

🌺 கருப்பர் வாரார்

வாராரய்யா வாராரு கருப்பரிங்கே வாராரு வாராரய்யா வாராரு கருப்பரிங்கே வாராரு... அள்ளி - முடிச்ச கொண்டையப்பா அழகுமீசை துள்ளுதப்பா வல்ல வேட்டிப் பட்டுடனே வாராரய்யா - ராசாப்போலே (வாராரய்யா) ஆளுயரம் அரிவாளாம் அதுக் கேத்த கம்பீரமாம் காலிலே - முள்ளுச்செருப்பாம் கருப்பனுக்கே தனிச் சிறப்பாம் (வாராரய்யா)

வீச்சரிவாள் கையிலுண்டு வேகமான குதிரையுண்டு சுற்றிவரும் பகையழிக்கச் சுக்குமாந் தடியமுண்டு (வாராரய்யா) இடுப்பிலே சலங்கையுண்டு இடிமுழக்கச் சிரிப்புமுண்டு வாக்கிலே வலிமையுண்டு வற்றாத கருணையுண்டு (வாராரய்யா) கையிலே சவுக்குமுண்டு கனகமணிச் சலங்கையுண்டு பாற்கடலில் பள்ளிகொண்ட பரந்தாமன் நாமமுண்டு (வாராரய்யா) சந்தனமுண்டு ஐவ்வாதுமுண்டு சாம்பிராணி வாசமுண்டு சம்பங்கி ரோஜாமுல்லை மணக்குதப்பா இங்கே இப்போ. (வாராரய்யா) - அருளிசைமணி நேமத்தான்பட்டி சுப்பையா அவர்கள்