அருள்மிகு செங்கிடாய்க் கருப்பர் படைப்பு – இராயவரம் என்பது நகரத்தார் சமூகத்தின் தெய்வநம்பிக்கை, தான தர்மம், குலதெய்வ நம்பிக்கை ஆகியவற்றை தலைமுறைகளைத் தாண்டி அழகாக இணைக்கும் ஒரு சிறப்பு மரபாகும்.
இந்த வரிகளில் நகரத்தார் சமூகத்தின் வள்ளன்மையும், கோவில் கட்டமைக்கும், திருப்பணிகளும் மூலம் நிலைத்து நிற்கும் ஆன்மிகச் செழிப்பும் சிறப்பாகப் போற்றப்பட்டிருக்கிறது. இத்தகைய பெருமை மிக்க சமூகம் அருள்மிகு செங்கிடாய்க் கருப்பரை குலதெய்வமாகக் கொண்டு இராயவரத்தில் நடத்தும் படைப்பு விழா, நம் அனைவருக்கும் ஒரே நேரத்தில் கடமையும், வாழ்வின் ஆசீர்வாதமும் ஆகும்.
கார்த்திகை மாத படைப்பு மரபு
ஒன்பது ஊர் இரணிக்கோவில் பங்காளிகள்
இராயவரம் · இராங்கியம் · கொப்பனாபட்டி போன்ற ஊர்களின் இணைப்பு
இந்தப் படைப்பு மரபு, ஊர்வழி மட்டுமல்லாமல், நம் சமூகத்தின் உள் ஒற்றுமையையும், பரஸ்பர அன்பையும் பிரதிபலிக்கிறது. பங்காளிகள் மட்டுமன்றி நகரத்தார் பக்தர்களும் ஆர்வத்துடன் கலந்து கொள்கிறார்கள்.
இப்படி நகரத்தார் அன்றி, மற்றைய ஆன்றோர்களால் புகழப்பட்ட நம் சமூகம் ஜனத்தொகை எண்ணிக்கையில் குறைவே. ஆனால் அவர்களின் நற்செயல்கள் எண்ணிலடங்கா.
மன்னர் பின்னோர் என்பதற்கேற்ப, கோவில்கள் கட்டினர், திருப்பணிகள் செய்தனர், பசுமடங்கள் அமைத்தனர், தங்குவதற்கான சத்திரங்கள் கட்டினர், கல்விச்சாலைகள் ஏற்படுத்தினர். தான தர்மங்கள் ஏராளம், ஏராளம்.
இத்துணை சிறப்புமிக்க சமூகத்தார் குல தெய்வவழிபாடுகளையும் சிறப்பாகக் கொண்டாடினர். முன்னோர்களை நினைவில் கொண்டு படைப்பு, பூஜைகளையும் ஏற்படுத்தி வழிபட்டு வருகின்றார்கள். இது நம் சமூகப் பரம்பரையினருக்கு வழிகாட்டும் செயலாகும்.
நகரக் கோவில்களுள் ஒன்றான இரணிக்கோவிலார் பல ஊர்களில் படைப்பு நடத்தி வழிபடுகின்றார்கள். அதில் மற்றவர்களும் புகழ்ந்து பேசப்படும் படைப்புகளில், இராயவரத்தில் நடந்துவரும் அருள்மிகு செங்கிடாய்க் கருப்பர் படைப்பு சிறப்பானது.
படைப்புகள் அதிகமாக நடந்துவரும் இராங்கியத்தில்தான் அருள்மிகு செங்கிடாய்க் கருப்பருக்கும் கோவில் வீடு ஒன்று அமைத்து வழிபட்டு வந்தார்கள்.
சுமார் நூறு ஆண்டுகளுக்கு முன் இராங்கியம் கோவில் வீடு எதிர்பாராவண்ணம் தீக்கிரையானபோதிலும் பேழைப்பெட்டிகள் மட்டும் சேதமின்றித் தப்பின. அருள்மிகு செங்கிடாய்க் கருப்பர் அருள்தான் காரணம்.
எல்லா ஊர் பங்காளிகளும் கூடிப் பேசி எடுத்த முடிவுப்படி பேழைப்பெட்டிகளை தலைச்சுமையாகவே எடுத்து சென்று இராயவரத்தில் ஒரு வீட்டில் வைத்தார்கள். காலையில் பேழைப்பெட்டிகளை எடுக்கப் போன பொழுது, அதை எடுக்க முடியவில்லை. “அங்கேயே வைத்து படையுங்கள்” என்று கருப்பர் அருளியபடி படைத்து வந்தார்கள்.
நாளடைவில் படைப்பை விரிவுபடுத்தி வழிபட, இராயவரம் புதுமனையில் இடம் வாங்கி புதிய கட்டிடங்கள் கட்டி, அங்கு பேழைப்பெட்டிகளைக் கொண்டு வந்து வைத்து பொதுப்படைப்புகள் நடந்து வருகின்றன.
இரண்டு வருடங்களுக்கு ஒருமுறை வரும் படைப்பு, கார்த்திகை மாதம் ஒரு வியாழன் தொடங்கி, திங்கட்கிழமை காலை பணியாரம் வாங்கிக்கொண்டு செல்லும்வரை நடக்கும்.
புதன் – கணபதி ஹோமம்
வியாழன் – அரிசி அளத்தல், பேழை நீராடல், புள்ளிவரி தேர்வு, பணியாரம் தயாரித்தல்
வெள்ளி – செங்கிடாய்க் கருப்பருக்கு அலங்காரம், பொங்கல் படையல், கிடாய் ரசம், அருள்வாக்கு
சனி – பெண் தொட்டிச்சி தெய்வப் படைப்பு, கோழி ரசம், களி, முட்டை தோசை
ஞாயிறு – மாப்பிள்ளை விருந்து, அலங்காரம் பிரித்தல், பேழை திருப்புதல்
வியாழன் மாலை 4 மணியளவில் பேழைப்பெட்டிகளை எடுத்துக்கொண்டு “மலைக்கொழுந்து ஈஸ்வரன் கோவில்” நீர்நிலைக்கு கொண்டு சென்று சேலை வேஷ்டிகளை அலசிக்கொண்டு வருவர். பேழைப்பெட்டிகளுடன், பிரார்த்தனை செய்து வைத்த ஏராளமான அரிவாள்களையும், கை மணிகளையும் எடுத்துச் சென்று கொண்டு வருவர்.
மணிகளை அடித்து எச்சரிக்கை ஓசை எழுப்பிச் செல்லும்போது எந்த ஜனங்களாக இருந்தாலும் ஒதுங்கிக் கொள்வார்கள். வியாழன் காலை இராயவரம் பங்காளிப் பெண்களுடன் மற்ற பெண்மக்களும் கலந்து கொண்டு பணியாரம் ஊற்றுவார்கள். மெஷினில் மாவு அரைத்து, கருப்பட்டி பாகு காய்ச்சி சுட்டு எடுப்பார்கள்.
வியாழன் மாலை பேழை வந்ததும் கருப்பருக்கு அலங்காரம் முடித்து, படையலிட்டு, சாமியாடி சாமி அழைத்ததும், செங்கிடாயை படைப்பு வீட்டு சாமிமுன் நிறுத்தி நீர் விளாவ, குட்டி உத்திரவு தந்து, தானாகவே அறைக்குள் சென்றுவிடும்.
தேர்ந்தெடுக்கப்பட்டவர்கள் குளித்துவிட்டு உள்ளே சென்று குட்டியை நிமித்தம் செய்து, தோல் தவிர கறியை துண்டுகளாக்கி தருவார்கள். அதை அண்டாவில் இட்டு ரசம் வைப்பார்கள். தோலை அதற்கென்று உள்ள இடத்தில் சேமம் சேர்த்து விடுவார்கள்.
படைப்புக்காக குலதெய்வம் கோவில்களில் குட்டி நிமித்தம் செய்து, பொங்கல் கொடுத்து தீர்த்தம் வாங்கிக் கொண்டு வரும் மரபு உள்ளது.
படைப்பில் பங்காளிகளும் பிறந்த பெண் மக்களும், பேரன் பேத்திகளும், மாப்பிள்ளைகளும் கலந்து கொள்வார்கள். படைப்பை பார்க்க வேண்டுமென்று நகரத்தார் பெருமக்கள் நிறைய வருவர். புதன்கிழமை முதல் சாப்பாடு துவங்கி விடும். காலை, மதியம், மாலை, இரவு என சாப்பாடு தடபுடலாக இருக்கும்.
செங்கிடாய் கொண்டுவரும் பொறுப்பை கொப்பனாபட்டி கொண்டுள்ளார்கள். பங்காளிகள் ஏற்றுக் படைப்பு வீட்டு சாமியாடியாக இருந்து வருபவர்கள் கொப்பனாபட்டி தெய்வத்திரு இராம. இராக்கப்ப செட்டியார் அவர்கள், குமாரர் திரு ராக. செல்வம் செட்டியார் அவர்கள்.
பூசாரிகளாக இராயவரம் பங்காளிகள் புள்ளிப்படி திருமணம் ஆனவர்கள் மட்டும் வரிசைக் கிரமமாக இருந்து வருகிறார்கள். மேலும் கொப்பனாபட்டியில் இளையாத்தாங்குடி வயிரவன் கோவில் புள்ளிகள் குறைவான எண்ணிக்கையில்தான் உள்ளனர். மற்ற அனைவரும் இரணிக்கோவில் பங்காளிகள் தான். காவல் வரி வசூல் செய்து, காவல் வைத்துவிட்டுத்தான் படைப்புக்கு வருவார்கள்.
படைப்பு வீட்டில் நிகழ்ச்சிகள் நடைபெறுவதற்காக முன்புறம் பெரிய மணி மண்டபமும், மற்ற புழக்கங்களுக்காக வலப்புறம் ஒரு மண்டபமும், பெரியதான பந்திக்கட்டு ஒன்றும் புதிதாகக் கட்டப்பட்டுள்ளது.
வெள்ளிக்கிழமை பிற்பகலிலும், சனிக்கிழமையிலும் பட்டிமன்றம், சொற்பொழிவு போன்ற நிகழ்ச்சிகள் நடைபெறும். பக்தர்கள் சோர்வின்றி இருக்க ஒவ்வொரு நாளும் காபி, டீ, சுக்குமல்லி காபி, சூப் இவைகளை தொடர்ந்து கொடுத்துக் கொண்டே இருப்பார்கள்.
அருள்மிகு செங்கிடாய்க் கருப்பருக்கு சொந்தமாக திருமண மண்டபம் ஒன்று இராயவரத்தில் உள்ளது. பிற இடங்களில் சொத்துக்கள் வாங்க கருப்பர் அருள்புரிவார்.
படைப்பு வீட்டிற்கு எதிரே உள்ள இடத்தை நமது கோவில் வீட்டைச் சேர்ந்த பெண் பிள்ளை, நற்சாந்துபட்டி முரு. மங்களம் ஆச்சி அவர்கள் நமது செங்கிடாய் கருப்பையா சுவாமிக்கு காணிக்கையாக கொடுத்து உள்ளார்கள். அவர்களுக்கு நன்றி தெரிவிப்பதுடன், அவர்கள் குடும்பம் எல்லா வளங்களும் பெற்று நலமுடன் வாழ நமது செங்கிடாய் கருப்பரை வேண்டுகிறோம்.
கொப்பனாபட்டி திரு. மு.ப.மு. பழ. முத்துக் கருப்பன் செட்டியார் மற்றும் திரு. PL. நாகராஜன் செட்டியார் இவர்களின் ஆலோசனையும் முயற்சியும் போற்றத்தக்கது. படைப்பு சிறப்பாக, நிறைவாக நடந்தேற எல்லா பங்காளிகளும் ஆர்வமாகவும் ஒத்துழைப்போடும் இருப்பார்கள்.
அருள்மிகு செங்கிடாய்க் கருப்பர் அருளால், இந்தப் படைப்பு மரபும், நம் சமூகத்தின் நற்பண்புகளும் தலைமுறைகள் தழைக்கட்டும்.